Kanu Badlya Jamaanu
कतगा भल्लु अर् प्यारु हमरु बचपन छाई
प्लास्टिका का न, माटा का खिलौंणा छाई
मोबैल, टीवी, वीडियो-गेम कख छै वेबगत
कंचा बटन या रीठों कि गुच्छी खेलदा छाई
छोरी नि जंणदि छै यु फेसबुक न व्हट्सएप
सैर्र्या दिन इच्चि-दुचि अर् बट्टी खेलदी छाई
नि जँणदि छाई नारी तब क्वी फैशन-फूशन
अद्धा दिन त लीखा-जुंवा मनमा कटेंदु छाई
नैं लारा त आंदा छाई सालमा बस एकी बार
फिर सर्र्या साल थ्यगलोंमा हि चलांदा छाई
चौंसंणि डांडि-कांठि गुंजदि छै ग्वेर-घसर्योंल
मुरलिकि भौंण सूंणि कि यु प्राण खुदेंदु छाई
हर साल मैँना बैसाख मा कौथीग उरेंदा छाई
माँ-बेटी अर् दगड्या नमान कन भेटेंन्दा छाई
बडु प्यार-प्रेम छै गौं का दाना-संयणों मा भि
सब एक चौक मा बैठिकि तंबखु खांदा छाई
ब्यो बरात्युंमा भि कन भलि रस्याँण रैंदि छाई
स्वाला-अरसा पकै कि डाळि कु रिवाज़ छाई
कनु बदल्या जमनु सर्र अर् कन लग्गी कांडा
अब कुछ त एडवांस च पर मनख्यात नि राई
Submitted By: Shiv Charan on 19 -Sep-2017 | View: 934
|
